Krasniqi, drejt titullit botëror

Pas fitores së brezit interkontinental përballë amerikanit Brajan Minto, tashmë duket se asgjë nuk mund ta ndalë Luan Krasniqin drejt titullit kampion bote. Kur duhen vetëm pak muaj nga 36-vjetori i lindjes, boksieri me origjinë shqiptare ka treguar një formë mjaft të mirë përpara 7 mijë tifozëve të pranishëm në arenën e Shtutgartit. "Në fund të këtij viti, Luani do të jetë mes boksierëve që pretendojnë fitimin e titullit kampion bote. Ky është objektivi ynë më i madh", ka deklaruar promotori Klaus-Peter Kohl. Në mundësinë e parë për fitimin e titullit në shtator 2005, Krasniqi është mundur me "knock-out" nga kampioni i atëhershëm, Lemon Brjuster. Në verë, shqiptari që përfaqëson Gjermaninë mund të ketë shansin për t‘u hakmarrë. "Me këtë fitore kundër Mintos, rruga është sërish e hapur. Luani tashmë ka hyrë sërish mes 10 boksierëve më të mirë dhe ky është një hap i madh përpara", ka vazhduar Kohl. Si kandidatë të mundshëm për t‘u ndeshur me Krasniqin në sfidat eliminatore për titullin botëror janë ish-kampioni Brjuster, Hasim Rahman ose Toni Tompson (të gjithë amerikanë). Dëshira e "Rotvajlerit" është që në ring të zbresë kundër Brjusterit. "Ai është preferenca ime e parë", ka deklaruar Krasniqi që të shtunën në mbrëmje festoi fitoren e 33-të si profesionist, ku nuk ka munguar të përshëndesë të gjithë shqiptarët dhe kosovarët. Një sukses përballë Brjusterit do të thoshte rrugë e lirë për t‘u bërë sfidanti i kampionit Shenon Brigs. Gjithsesi, boksieri nga Nju-Jorku do të ndeshet më parë për të mbrojtur titullin kundër rusit, Sultan Ibragimov, më 2 qershor.