Seksi jo vetëm si tabu

Seksi jo vetëm si tabu

Joanna Rytel dhe Alban Muja, në Tiranë për të xhiruar një film mbi seksin


Joanna Rytel, një artiste e re suedeze, ka mbërritur sërish në Tiranë për t‘i dhënë fund video-filmit me të cilin kërkon të prezantohet në një Festival Ndërkombëtar. E shoqëruar nga artisti kosovar, Alban Muja, i cili është edhe bashkautor i kësaj videoje, dy artistët po i japin fund xhirimeve këtë fillimmarsi për atë që ata mendojnë se do të jetë një nga prodhimet më interesante për seksin. Muja thotë se puna për realizimin e kësaj videoje ka nisur qysh një vit më parë dhe pothuajse të gjitha xhirimet janë bërë në Tiranë. Ideja e Rytel që ky film të bazohet mbi seksin, nuk është shumë e papritur nëse i hedh një vështrim punëve që ajo ka realizuar deri tani. Duke zgjedhur vendin ku seksi është ende një tabu për t‘u folur hapur si Shqipëria, ajo kërkon ta rrëfejë këtë moment në jetën e çdo njeriu si diçka reale dhe jo si një tabu. "I gjithë filmi kërkon të rrëfejë diçka më shumë rreth seksit, jo si diçka që thyen tabutë, por si diçka që sjell një realitet", thotë Muja. Ata kanë filmuar një ngjarje të vërtetë seksi mes dy artistëve dhe një djali nga Tirana, për të treguar se ky është një moment real, i cili nuk mund të fshihet.

Për Joanën, ky video-film kërkon të përcjellë nëpërmjet pasazheve të tilla paksa erotike, atë çfarë ndodh nëse ne mundohemi të fshehim gjëra reale, gjëra që nuk mund të jenë më një tabu. Duke e parë pak më thellë atë çfarë mund të quhet thjesht "seks", artistja suedeze kërkon të luajë me imazhe të tilla që për një publik mund të jenë edhe torturuese nëse i sheh vazhdimisht. Por Joana ka eksperiencë në rrëfime të tilla. Vitet e fundit, ajo është përqendruar për të treguar detaje të tilla të jetës, duke provokuar edhe në vendin ku jeton. Interesante është krijimi i saj artistik i bazuar mbi një rrëfim të ngjarjeve politike që ndodhnin në Suedi. Disa vite të shkuara, Kryeministri (mashkull) suedez, publikisht anoncoi se ai ishte një feminist, duke lënë të kuptohej se të tjerë liderë nga partitë e tjera politike bëjnë të njëjtën gjë. Në vitin 2005, Suedia ishte i pari vend në botë ku lindi partia e parë feministe në nivel të lartë parlamentar "Iniciativa femërore". Njëra nga themelueset e saj ishte Tiina Resenberg, e cila tha: "Martesa padyshim që ka vlera dhe është diçka e mirë.... Mos u frikësoni nga një plak i sëmurë me leucemi në rrugë, frikësohuni nga familja". Por suedezët janë lloj njerëzish të ftohtë.

Mbi këto histori, Joana realizoi një sërë video-arti për të rrëfyer gjërat që gjithnjë na duken si "të bezdisshme" për t‘u rrëfyer. Për Joanën videoja që po përgatit në Tiranë, e cila së shpejti do të jetë në fazën e montimit është diçka tepër reale, ndaj ajo kërkon nëpërmjet këtyre pasazheve të filmuara një vështrim më të drejtë pa ndërlikime të situatave që lidhen me gjëra që janë brenda nesh.