Tirana, 10 milionë për Teutën

Tirana, 10 milionë për Teutën

Bardheblutë kërkojnë me çdo kusht të kualifikohen edhe në Kupën e Shqipërisë


Tirana kërkon me çdo kusht të jetë ekipi dominues në futbollin shqiptar në këtë sezon dhe për ta bërë këtë nuk llogarit edhe shpenzimet "ekstra". Drejtuesit e ekipit bardheblu u kanë premtuar lojtarëve një premio prej 10 milionë lekësh të vjetra nëse arrijnë të kualifikohen në gjysmëfinalet e Kupës së Shqipërisë. Meqenëse janë mundur në ndeshjen e parë nga Teuta me rezultatin 2-1, për të motivuar lojtarët është vendosur një superpremio, edhe pse kjo është në kundërshtim me rregulloren e vendosur në fillimin e sezonit. Lojtarëve u është premtuar nga 2 milionë lekë për kokë në rast fitoreje të trofeut të dytë nga rëndësia, por që tashmë kalon në plan të parë, pasi kampionati duket më se i siguruar.

Kryesimi me diferencë të thellë në kampionat nuk i mjafton Tiranës, e cila përveç titullit të saj të 23-të, kërkon që në këtë sezon të marrë gjithçka, duke siguruar edhe Kupën e Shqipërisë. Ndonëse ky objektiv nuk shihej si primar nga drejtuesit bardheblu në fillimin e sezonit, ata kanë ndryshuar mendje, duke parë se në këtë turne kanë më shumë rivalitet se në kampionat ku me mbylljen e fazës së dytë do të kenë thuajse të siguruar titullin kampion. Por planet e Tiranës për fitoren e të dy trofeve janë prishur nga Teuta, e cila është ndjekësja më e afërt në kampionat. Bregdetarët kanë arritur t‘i marrin një fitore 2-1 bardhebluve dhe tashmë rrezikojnë t‘i eliminojnë nga turneu. Kjo ka shtyrë donatorët e Tiranës t‘u premtojnë lojtarëve një premio të veçantë vetëm për kualifikimin kundër Teutës. Bëhet fjalë për 10 milionë lekë të vjetra nëse do të arrihet përmbysja e ndeshjes së parë dhe kalimi në gjysmëfinale. Sipas burimeve pranë klubit në fjalë, kjo bie pak në kundërshtim me "rregullat" e vendosura në fillimin e sezonit. Donatorët u kanë premtuar lojtarëve premio për fitoret jashtë fushës, por kanë bërë të ditur se një gjë e tillë nuk do të ndodhë në Kupën e Shqipërisë. Ata kanë vendosur një premio prej 2 milionë lekësh të vjetra për çdo futbollist nëse fitohet ky trofe, ndërsa nuk do të ketë premio në ndeshjet e veçanta.

Edhe pse më parë bardheblutë duhet të mendojnë për të kaluar Shkumbinin në fundjavë, drejtuesit e Tiranës e kanë parë të arsyeshme të mendojnë që tani për Kupën, pasi në kampionat avantazhi ndaj ndjekësve është shumë i thellë. Kjo tregon tashmë edhe sigurinë që ka Tirana për fitimin e kampionatit, duke menduar shumë më parë për Kupën. Tirana është fituese në fuqi e trofeut në fjalë, por në edicionin e kaluar nuk arriti të fitonte kampionatin duke mos bërë të mundur sigurimin e të dy trofeve njëkohësisht.