Ronaldinjo, sinjal Barcelonës: Dua të vazhdoj karrierën këtu

Ronaldinjo, sinjal Barcelonës: Dua të vazhdoj karrierën këtu



Rikthimi te rezultatet si dhe një veprim spektakolar ndaj Atletiko Bilbaos, i kanë mjaftuar Ronaldinjos për të kuptuar se cila është e ardhmja e tij. Lojtari ka lënë pas polemikat me shokët dhe disa paraqitje zhgënjyese, duke deklaruar tashmë se nuk ka ndër mend që të lëvizë. "Jam i lumtur dhe i qetë, i lumtur mbi të gjitha për datëlindjen e djalit tim", deklaroi ai pas fitores 2-1 ndaj Saragozës që i kualifikoi katalanasit në gjysmëfinalet e Kupës së Mbretit. Titujt e gazetave spanjolle e kanë shqetësuar pak fantazistin e Barcelonës, sidomos fakti se të gjithë mundoheshin ta paraqitnin atë si një futbollist drejt rënies dhe mbipeshë. "Kam kaluar një javë të vështirë për shkak të atyre fotove, nëpërmjet të cilave mundoheshin të tregonin se unë jam mbipeshë. E kam përjetuar keq këtë situatë. Të gjithë, kudo, më thoshin se duhej të ushqehesha më pak, por kur e shihja veten në pasqyrë dukesha mirë. Ajo që ndodhi më shërbeu për të gjetur motivimin dhe për të kuptuar që jam shumë mirë me veten time, pastaj të tjerët të mendojnë çfarë të duan", deklaroi Dinjo.

Driblimi marramendës në ndeshjen kundër Atletik Bilbaos është ende në mendjen e tifozëve të Barcelonës, të cilët nuk duan që ai të largohet. "Më vjen keq që nuk shënova, por e rëndësishme është që e provova, që fituam dhe që në skuadër u kthyen lojtarë të rëndësishëm. Kam edhe një gjë tjetër që dua t‘ia them të gjithëve. Jam i lumtur dhe sa më shumë që kalon koha, aq më shumë jam i bindur që do të qëndroj te Barcelona për shumë vite të tjera", deklaroi braziliani. Në një situatë të tillë, duket thuajse e mbyllur çdo hipotezë që e sheh atë të ndryshojë destinacion drejt Italisë apo Anglisë, ku Milani dhe Çelsi ëndërrojnë ta shohin me fanellën e tyre. Tani është në dorën e drejtuesve të Barcelonës të vendosin se si të shpërblejnë besnikërinë e tij, normalisht me një rritje të ndjeshme të kontratës.