Njeriu i momentit në Austri, Salihi i “çmend” të gjithë

Dy golat e shënuar të shtunën kundër Matersburgut, e kanë bërë Hamdi Salihin njeriun e ditës në Austri. Sulmuesi i kombëtares shqiptare ka qenë ndër më të lakuarit në mediat austriake ditën e djeshme, si njeriu që jo vetëm shënoi dy gola për Riedin, por ktheu fatin e një takimi krejt i vetëm. Komentet nuk kanë munguar për të, që nga trajneri Helmut Kraft apo edhe nga shtypi vendas, që ishte shumë skeptik për marrjen e shqiptarit në muajin janar. Vetëm dy ndeshje dhe shkodrani ka bërë që të gjithë të flasin për të, edhe pse vetë është treguar modest në prononcimin përpara gazetarëve. “Nuk ka rëndësi se kush shënon, e rëndësishme është që të fitojë skuadra”, ka thënë Salihi. Shkodrani i ka dhënë edhe të drejtë vetes që të festojë pas një nate të tillë. “Nuk e kisha menduar se do të shënoja dy gola në këtë mbrëmje, tani mendoj se duhet të festojmë paksa”, shprehet futbollisti kuqezi. Takimi ishte 1-0 për vendasit e Matersburg deri 13 minuta nga pjesa e dytë, por aty doli në pah aftësia shënuese e shqiptarit, që arriti të realizonte dy herë. Tekniku Kraft nuk i ka kursyer elozhet për shqiptarin, nga i cili pret akoma më shumë gola në stinën e pranverës. Në fakt, Kraft ka qenë njeriu që besoi më shumë tek shkodrani, duke ia shkëputur nga duart Rapidit të Vjenës edhe pse Bariç e kishte këshilluar Salihin që të shkonte në kryeqyterin austriak. “Në fund të pjesës së parë nuk e mendonim se mund të merrnim tre pikë nga kjo ndeshje”, ka thënë Kraft. “Por, më pas Salihi shënoi dy gola dhe na dha fitoren. Ai është një gjahtar tipik goli dhe shpresoj që të vazhdojë kështu për të gjithë pranverën”, është shprehur tekniku i Riedit. Më tej, Kraft ka falënderuar gjithë skuadrën për atë që dha në fushën e lojës. “Jam shumë i kënaqur me ekipin tim. Ne morëm një rezulat shumë të mirë. Ajo që më shetëson megjithatë, është fakti se nuk arritëm ta fitonim ndeshjen 1-3. Salihi është një sulmues tipik goli dhe këtë e ka dëshmuar shumë herë në Shqipëri. Unë jam i sigurt, se me atë do të kemi shumë kënaqësi”, përfundoi Kraft.